Pierre de Ronsard (1524-1585)
Plus estroit que la Vigne
III · Sonnets pour Hélène (pièces ajoutées) (1578)
Plus estroit que la Vigne à l’Ormeau se marieDe bras souplement forts,Du lien de tes mains, Maistresse, je te prie,Enlace-moy le corps.
Et feignant de dormir, d’une mignarde face,Sur mon front panche toy :Inspire, en me baisant, ton haleine et ta grâceEt ton cœur dedans moy.
Puis appuyant ton sein sur le mien qui se pâme,Pour mon mal appaiser.Serre plus fort mon’col, et me redonne l’amePar l’esprit d’un baiser.
Si tu me fais ce bien, par tes yeux je te jure,Serment qui m’est si cher,Que de tes bras aimez jamais autre avantureNe pourra m’arracher :
Mais souffrant doucement le joug de ton Empire,Tant soit-il rigoureux,Dans les champs Elisez une mesme navireNous passera tous deux.
Là morts de trop aimer sous les branches Myrtines,Nous verrons tous les joursLes anciens Héros auprès des HéroïnesNe parler que d’amours.
Tantost nous dancerons par les fleurs des rivagesSous maints accords divers,Tantost lassez du bal irons sous les ombragesDes Lauriers tousjours verds :
Où le mollet Zephyre en haletant secoue,De souspirs printaniersOres les Orangers, ores mignard se joueEntre les Citronniers.
Là du plaisant Avril la saison immortelleSans eschange se suit :La terre sans labeur de sa grasse mammelleToute chose y produit.
D’embas la troupe sainte autrefois amoureuse,Nous honorant sur tous.Viendra nous saluer, s’estimant bien-heureuseDe s’accointer de nous.Puis nous faisant asseoir dessus l’herbe fleurie,De toutes au milieu,Nulle en se retirant ne sera point marrieDe nous quitter son lieu.
Non celle qu’un Toreau sous une peau menteuseEmporta par la mer :Non celle qu’Apollon veit vierge despiteuseEn laurier se former :
Ny celles qui s’en vont toutes tristes ensemble,Artemise et Didon :Ny ceste belle Grecque à qui ta beauté semble,Comme tu fais de nom.
[Pièce figurant aux Amours Diverses à partir de 1584].
Thèmes : Amour Érotisme Nature
Domaine public. Texte : Wikisource, d'après l'édition éds. Bossard, 1921, dans l'orthographe de cette édition.