Mes poèmes - Livre d'or - Liens - Moi

Asmi i theddeṛ ddunit

le samedi 08 octobre 2022, à 22:03. Posté par Nedjma Tafat (auteur : Nedjma Tafat)

Asmi i theddeṛ ddunit 💜 Čḥen lefṣul di tlata Amwan anebdu ccetwa Ur ufan ḥedd ad s-ḥkun Tafsut aṭas i terḥa S lweṛd d rriḥa Leḍyur fell-as i cennun Ccbaḥa-ines d amedya Tessleb leεmala Wamma amedyaz yettarun Anebdu yerra ar daxel-is Almi i ifaḍ wul-is Am win ur nesεi ara bab Inuced-d imdukkal-is Icuban s ixef-is Widak i yesεa d leḥbab Yufa tagrest di lḥal-is Tneggi s wegris Ar medden ur tettuneḥsab Ḥartadem irkeb-it waḍu Deg yiḍ yetthubbu Deg wass issexrab lecɣal Simmal di zzεef irennu Yekkat yettruẓu D lɣiḍ i s-iqqlen d ccwal Yezzizwiḥ ur yettrusu Icba deεwessu Yugi ad ibeddel leḥwal Yiwwas qesden-d ad tt-frun Bdan la ḥekkun D ccwaṛ i d aḥbib-nsen La ttektilin la rennun Reffden srusun Merriɣet temsalt-nsen Ulawen-nsen d lkanun Si tismin tezzun Yiwen uεekkaz i ten-iwwten Waqila rreḥba tefra Juban-d ccufa Abrid ar yixef n useggas Siwa netta i d ssebba Miḥyef mi t-iga Ur yuggad ddnub fell-as I tefsut yefka lhiba Mebla tilisa Cennun ifrax af ṣṣifa-s Nnan-as d acu ad nexdem Bezzaf nettwaḍlem Nessusem tura ar melmi Nnig wul i nettasem Cceḥna teqdem S tmara i d-neggar tiɣri Ma d tafsut kulci-s yewqem Tesεa zzin terqem Ar ɣur-s i twehha tmuɣli Ḥsu ma ur tt-tefriḍ ara Ad d-tas ccedda Ad k-neqqel d yir lawan Aḍu ad d-yazen ccetwa Abruri d lehwa Adfel ad k-yergel amkan Lebraq rrεud ssixṭa Izilan takka Ad ak-nessexreb ussan Iwhem useggas yewḥel Imeyyez imuqel Tamsalt ansi ara tt-yebdu Yuggad tawwurt ad tergel Anda-k a leεqel Iwḥec aḍu n deεwessu Ur yezmir ad ibeddel Ayen akken illan d laṣel Si zzman akka i tetteddu Inṭeq useggas yenna Fehmet lmeεna Arut-tt deg wulawen Ad bduɣ seg-m a ccetwa Deg i tgemmu nneεma S waman d yideflawen Tesswayeḍ igran lexla Ferrḥen yecbuyla Tekkseḍ laẓ i yigellilen I keččini a ḥartadem Ttxil-k ur ḥezzen Ur s-qqar nekk d ameɣbun Deg-k i teffɣen medden Lexlawi εemṛen S tyugiwin d lmaεun Ussan-ik d iḥlawanen S tiram bninen Ttqerriben-d ar lkanun Anebdu a lɣut aḥnin Issefraḥen tudrin S lxir-is ma d-yennunnet Akufi s yirden timẓin Iḍmen tiswiεin Umeččim mi ara d-yewwet Ikkes laẓ ula i tweḍfin Annar s tgedrin Iḍerra send aserwet Turad seg wul cceḥna Lefṣul di tlata Ur uɣalen ad ccetkin Ddunit akka i tebna Gar medden meṛṛa Ur εdilent tektiwin Iwiɣ-tt-id kan d lmeεna Lfayda d lefhama Ma ṭṭuqtent tmussniwin Nedjma Tafat

<< Retour aux poèmes

Mes poèmes - Livre d'or - Liens - Moi